На заєднїцку инициятиву, у Вуковаре всоботу, 28. януара, отримана схадзка Координациї рускей националней меншини Републики Горватскей и чолнїкох Националного совиту Руснацох Сербиї, на хторей догварене о конкретним сотруднїцтве у обласцох важних за нашу меншину у обидвох жемох. Пошвидко, о орґанизованим сотруднїцтве Руснацох з двох бокох Дунаю будзе подписани и окремни документ

Всоботу у Новим Садзе отримани Други Национални руски бал, у орґанизациї Националного совиту Руснацох.
Бал отримани у Готелу Нови Сад, а було прейґ 170 госцох зоз скоро шицких местох дзе жию Руснаци у Воводини.

На соботу, 21. януара, у Новим Садзе будзе отрумани Национални руски бал, у орґанизациї Националного совиту Руснацох.
Бал будзе отримани у Готелу Нови Сад, од 19,30 годзин.
Уходнїца 2 тисячи динари, а подрозумює вечеру и напой под час цалого вечара. На балу будзе виводзена руска народна и забавна музика, будзе орґанизована томбола, а за превозки обезпечени готелски паркинґ.

У рамикох програми Централней шветочносци означованя Националного швета Руснацох, внєдзелю, 15. януара у Дюрдьове, у Грекокатолїцкей Церкви Рождества Пресвятей Богородици, наш владика, апостолски еґзарх за грекокатолїкох, кир Георгий Джуджар служел Благодарну Архиєрейску Службу Божу.

- Мам окремну чесц и задовольство же по пиятираз можеме преславйовац тото нашо вельке швето - 17. януар, хтори нам означує 260 роки як зме на тих просторох. Часи можебуц подобни як пред 260 роками, вироятно же и теди криза и обставини нагнали 200 фамелиї же би почали насельованє на тоти простори.

Главни орґанизаторе програми Централней шветочносци означованя Националного швета Руснацох у Сербиї були Завод за културу войводянских Руснацох, Орґанизацийни одбор Централней шветочносци, Национални совит Руснацох и КУД „Тарас Шевченко”, Дюрдьов.

Вочи Националному швету Руснацох, до Националного совиту у Руским Керестуре 16. януара  сцигла телеграма-винчованка од предсидателя Координациї националних совитох националниох меншинох у Сербиї Витомира Михайловича.
- Почитовани предсидатель, винчуєме Вам и рускому народу Националне швето Руснацох, з найщиршима жаданями за дальше еманципованє Вашого народу - гвари ше у винчованки.