Програма Шветочней академиї
Шветочна академия з нагоди означованя Националного швета Руснацох почала з гимну Сербиї и Шветочну шпиванку Руснацох у Сербиї „Браца Русини”, хтори одшпивал дюрдьовски Хор „Розанов”, под дириґенством Татиани Барна.
„Розанов” потим одшпивал и „Писню о Руснакови” Татиани Барна, на текст Владимира Сабо Дайка, а у музичней часци програми участвовали шпиваче Саня Полдруги, Мирела Мали, Танита Ходак, Ивана Привизер, Борис Маґоч, Михал Колєсар, Иґор Ґрекса, Марко Радишич, Верица Салонски, Константин Чордаш, Лидия Кухар, Уна Молнар и Мирослав Кочиш - шпиваче з наших местох и з Дюрдьова.
Шпиваче як солисти, дуети, триа, лєбо у ґрупох, шпивали нашо нови композициї авторох текстох, лєбо музики з Дюрдьова - Амалиї Хромиш, Оленки Сеґеди, Мариї Рамач Сеґеди, Михала Лїкара, Янка Грубенї, Маґдалени Горняк Лелас и М. С. Горняк.
Спомнути шпиваче шпивали и дзепоєдни народни шпиванки, як и Жридлова ґрупа КУД „Тарас Шевченко”, та Младежска ґрупа дюрдьовского КУД.
У текстуалней часци, наступел поета з Дюрдьова Яким Чапко, котри гуторел свойо стихи, док рецитатор Александар Мудри з Кули гуторел стихи дюрдьовских поетох и писательох - Миколи М. Кочиша, Мирослава Стрибера и Владимира Кочиша.
Попри тим же провадзели шпивачох, свойо окремни точки мали и Национални оркестер, под дириґенством Юлияна Рамача Чаму и Тамбурови оркестер дюрдьовского КУД „Тарас Швеченко”, хтори пририхтал Михал Лїкар.
Конферансу написал Яким Чапко, а водзели ю Марина Рамач и Златко Рамач. На концу, шицки учашнїки, вєдно з публику, одшпивали Многая лїта, же би културно-уметнїцка програма закончена з инструменталним виводзеньом композициї Витомира Бодянца, на слова Миколи Сеґедия „Дюрдьове мой”.
Сценоґрафию за Централну шветочносц обдумала Марияна Прентович, а дизайн плакати и поволанкох за тоту нагоду виробел Дарко Вукович.
По програми, госци, домашнї и учашнїки у просторийох дюрдьовского КУД „Тарас Шевченко” участвовали на заєднїцким друженю, наволаним Дюрдьовски вечар, дзе служени и традицийни руски єдла.
Руски
Српски
English
