На нас ше стої отримованє на тих просторох

- Мам окремну чесц и задовольство же по пиятираз можеме преславйовац тото нашо вельке швето - 17. януар, хтори нам означує 260 роки як зме на тих просторох. Часи можебуц подобни як пред 260 роками, вироятно же и теди криза и обставини нагнали 200 фамелиї же би почали насельованє на тоти простори. И нєшка подобни обставини, алє тедишнї приселєнци, з 200 фамелийох у єдней хвильки наросли на 25 тисячи, вєдно з нашима братами прейґа Дунаю. Як ше им то удало? Були вредни, витирвали, упарти и, насампредз - зєдинєни. Любели и почитовали свойо - гварел у привитней бешеди предсидатель Националного совиту Руснацох Славка Раца, на програми Централней шветочносци означованя швета, 15. януара у Дюрдьове.
- Я ше наздавам же и ми нєшка, по угладзе на нїх, можеме назберац моци и можеме ше врациц нашим кореньом, можеме буц знова и вредни, и упарти, и зєдинєни, и можеме любиц и почитовац свойо. Нє важне хто з хторей партиї приходзи, нє важне хто хтору руску опцию заступа. Важне же цо поробел за свой народ, за Руснацох. По тим вас буду паметац, и прето, треба же бизме ше тому намагали - цо можеме тому народу допринєсц.
- Теди кед пришли, пред 260 роками, перше збудовали церкви и школи. Ми нєшка сиґурно маме красши и векши и школи и церкви, алє, нажаль, вше су нам празнєйши, вше нас менєй єст.