Швето повинчовали

На початку пригодней културно-уметнїцкей програми од 20 г., у Велькей сали Дому култури у Дюрдьове, Националне швето Руснацох у Сербиї припаднїком нашей меншини 15. януара  повинчовали предсидатель Националного совиту Руснацох Славко Рац, предсидатель Општини Жабель Бранко Стаїч и апостолски еґзарх за грекокатолїкох у СЧГ, владика кир Георгий Джуджар.
На културно-уметнїцкей програми присуствовали подпредсидатель Скупштини АП Войводини Бранимир Митрович, амбасадор Канади у Сербиї Роман Ващук, представителє Амбасади України у Сербиї Александер Кириченко и Юрий Мянсветов, як и представителє Руснацох з Горватскей.
 

На програми Централней шветочносци присуствовали и народни посланїки у Скупштини Сербиї Олена Папуґа и Дюра Мученски, покраїнски посланїки зоз жабельскей општини, представителє националних совитох других меншинох у Сербиї, представителє Општини Жабель и дзепоєдних општинох дзе жию Руснаци и Месней заєднїци Дюрдьов.
Вшелїяк, програми Централней шветочносци и културно-уметнїцку програму провадзели и члени Националного совиту (НС) Руснацох и його одборох, координаторе подручних канцеларийох НС, представителє скоро шицких местох дзе жию Руснаци у Сербиї, односно наших КУД и здруженьох, представителє наших институцийох и установох, представителє церкви, медийох, як и числена публика у сали дюрдьовского Дому култури.
Сала Дому култури у Дюрдьове ма коло 350 места, хтори шицки були пополнєти, аж дзепоєдни нащивителє културно-уметнїцку програму провадзели на стояци, а могли ю провадзиц и други, понеже Руска редакция Информативней програми Телевизиї Войводини внєдзелю директно преношела шветочну академию з Дюрдьова.

Датум: 18. 01. 2012. - 22:41г