Благодарна Архиєрейска Служба Божа

У рамикох програми Централней шветочносци означованя Националного швета Руснацох, внєдзелю, 15. януара у Дюрдьове, у Грекокатолїцкей Церкви Рождества Пресвятей Богородици, наш владика, апостолски еґзарх за грекокатолїкох, кир Георгий Джуджар служел Благодарну Архиєрейску Службу Божу.
Сослужовали дзевецме священїки з нашого Апостолского еґзархату - о. Роман Миз, о. Михайло Режак, о. Владислав Рац, о. Михайло Малацко, о. Яков Новак, о. Юлиян Рац, о. Владимир Еделински Миколка, о. Платон Салак, ЧСВВ и о. Дарко Рац. Службу шпивал дюрдьовски Хор „Розанов”, у хторим шпивали и парох дюрдьовски о. Йоаким Холошняй и капелан о. Михаил Холошняй.
- З нагоди Националного швета Руснацох, збераме ше вєдно, же бизме з духовнима и кулурнима манифестациями пошведочели нашу духовну и националну припадносц - гварел апостолски еґзарх, кир Георгий Джуджар на Архиєрейскей Благодарней Служби Божей. 

У мено домашнїх, о. Холошняй подзековал орґанизатором преслави Швета и привитал присутних, медзи хторима були и народна посланїца у Скупштини Сербиї Олена Папуґа, заменїк предсидателя Совиту националних заєднїцох у Скупштини АП Войводини Леона Виславски и предсидатель Националного совиту Руснацох Славко Рац.
У своєй казанї, еґзарх кир Георгий наглашел же дзекуєме Богу за ласки, помоц и охрану хтору нам давал прейґ наших предкох, за хторих ше модлїме.
- Обрацме увагу на слова з Євангелиї, же бизме порихтали драгу Господню и вировнали му дражки. То як кед ми сцеме порихтац поля, же би зарно принєсло добри плод. Порихтайме нашо души за Божи благослов, же бизме будовали наш национални духовни дом за нас и потомкох. Кед Бог нє будує, дармо ше будователє трудза.
- Того були свидоми нашо предки хтори будовали на добрих основох. Ми тераз потвердзуєме вирносц и модлїме ше за щешлїву будучносц. То драгоказ за терашньосц и тестамент за будучносц, кед нє сцеме заблукац - гварел кир Георгий на Благодарней служби внєдзелю у Дюрдьове и повинчовал Националне швето.

Датум: 18. 01. 2012. - 22:43г