Централна шветочносц у Дюрдьове
Централна шветочносц означованя 17. януара - Националного швета Руснацох у Сербиї, отримана пиятираз, того року15. януара у Дюрдьове.
Централна шветочносц означованя Швета почала пополадню, з презентацию Програми защити „Рускей школи” у Дюрдьове. О Програми защити бешедовали директор Заводу за културу войводянских Руснацох Мирослав Кевежди, а сам Проєкт защити представела архитекта-конзерватор Славица Вуйович.
З тей нагоди представени и богате и крашнє пририхтани Каталоґ предметох етноґрафско-историйней збирки „Руска одлога”, о чим бешедовала редакторка Каталоґу, музейни совитнїк-историчар Любица Отичова.
Отвераню Рускей школи присуствовал и директор Заводу за защиту памятнїкох Войводини Зоран Вапа, а обєкт Рускей школи отворел предсидатель Орґанизацийного одбору Централней шветочносци, заменїк предсидателя Националного совиту Руснацох Мирон Сабадош.
Од 17 г., у Церкви Рождества Пресвятей Богородици, наш владика, апостолски еґзарх за грекокатолїкох, кир Георгий Джуджар служел Благодарну Архиєрейску Службу Божу. Сослужовали дзевецме священїки з нашого Апостолского еґзархату, а Службу шпивал дюрдьовски Хор „Розанов”.
По Служби, у просторе ткв. „Ленки” коло Дому култури, пририхтаним за тоту нагоду, отворена вистава подобових роботох з назву „Подобова ґрупа - Дюрдьов”, на хторей свойо роботи викладали 11 подобово творителє з Дюрдьова.
По штири роботи Ивана Киша, Татяни Перович, Мити Пушкарова, Ґордани Прокин Ґутеша, Симеона Рамача, Маї Дорокхази, Юлияна Колєсара, Владимира Дорокхазия, Михайла Холошняя, Олї Ґнип и Мирослава Чакана вибрал мр Данило Вуксанович, котри и отворел виставу.
Госцох на вистави, у мено домашнїх привитали Мирослав Чакан и Мирослав Кевежди, а мр Данило Вуксанович автор и огляднуца на виложени подобово роботи, у з тей нагоди публикованим каталоґу.
Руски
Српски
English
