Беоґрад
Стреду, 18. януара парохиянє беоґрадскей парохиї св. Кирила и Методия означели Националне швето Руснацох. Парох о. Владислав Варґа у каплїчки служел Саночне и Службу Божу, а пошвецена и богоявленьска вода. На шветочносци було наисце вельке число Беоґрадянох, а радосц з нїма подзелєли и високи госци: Роман Ващук, амбасадор Канади, зоз супругу, потим Виктор Недопас, амбасадор України, и його совитнїки Юрий Мансвиетов и Владимир Биелиаиев, секретар амбасади Ватикану Жозе Леите Ногера. Зоз своїм присуством потвердзели же и наш културни скарб у сфери їх интересованя и директор канцелариї Италиянскей Кооперациї за розвой Беоґраду, др Санта Моле, архитекта–конзерватор зоз Високого Институту за конзервацию и Обнову зоз Риму, др Донатела Кавезали, и директор Централного Институту за конзервацию, археолоґ др Мила Попович Живанчевич.
На означованю швета бул и предсидатель Церковного одбору парохиї св. апостолох Петра и Павла зоз Нового Саду и секретар Союзу Руснацох и Українцох Сербиї и Чарней Гори, Славко Джуджар.
После щирих привитних словох домашнього пароха о. Владислава, о важносци моцнєня наших заєднїцох и чуваня националней свидомосци бешедовала и Мелания Римар, член Националного совиту Руснацох и предсидателька Одбору за образованє.
У културней програми ше представели наймладши Руснаци у Беоґрадзе, Валентина Няради и Саня Иванович хтори грали на гармоникох, а Гая Надьова на ґитари. Студенткиня Инес Синко пречитала писню Михала Рамача «Криж на штред Керестура», а водителька програми Олґица Радович кратко представела творчосц того нашого поети, новинара, историчара и прекладателя, добитнїка велїх високих припознаньох и наградох.
Тиж представени и учитель Михайло Ковач, єден з найвекших руских писательох, добитнїк награди за животне дїло Дружтва писательох Войводини, добитнїк Змайовей награди и Ордену Ярослава Мудрого. Панїматка Славица Варґова пречитала Ковачову писню «Молитва сучасного чловека», а познату и компоновану писню Амалиї Хромиш «Селїдби» пречитала Мелания Римар.
Наш познати шпивач и член дакедишнього ансамблу «Роса» Йовґен Надь одграл на ґитари и одшпивал даскельо руски и українски шпиванки, а на концу шицки у публики шпивали «Многая лїта».
Шветочносц предлужена коло столох на хтори вредни руски ґаздинї навикладали смачни руски єдла: капущанїки, ґоргелї, осух, пироги, бобальки, череґи и друге, а за тоту нагоду панї Олґица Радович пририхтала окремну презентациї спомнутих єдлох. Сала за друженє госцох и домашнїх украшена зоз рускима партками и прекраснима вишивками.
Руски
Српски
English
