Схадзка Одбору за информованє

Медзи найважнєйшима активносцами Одбору за информованє Националного совиту (НС) Руснацох у 2012. року будзе утвердзованє мрежи руских медийох, сотруднїцтво медзи редакциями, виробок Стратеґиї розвою руских медийох, едукация и подмладзованє редакцийох з младима кадрами - заключене на схадзки одбору, хтора 14. фебруара отримана у просторийох Радио Нового Саду.
Як заключене, понеже Одбор не ма прецизни податки кельо влонї потрошене на його активносци, кельо з тих средствох будзе пренєшене до того року и кельо НС видвої за роботу Одбору у тим року, прецизнєйши план активносцох у 2012. року Одбор принєше на своєй шлїдуюцей схадзки.
Одбор розпатрал и молбу Скупштини општини Бачка Тополя о часточним преношеню сновательних правох над явним информативним подприємством (ЯИП) „Бачка Тополя” и на Национални совит Руснацох. Спомнуте подприємство РТВ програму емитує на сербским, мадярским, словацким и руским язику. Часточне преношенє сновательних правох над ЯИП „Бачка Тополя” порушане понеже є плановане у Медийней стратеґиї войводянских Мадярох, хтору прилапел Национални совит тей меншини, а у складзе зоз Законом о националних совитох националнох меншинох.
Одбор розпатрал потребу часточного преношеня сновательних правох над спомнутим подприємством и на НС Руснацох и заключел же би наш НС тото преношенє правох прилапел, алє аж после приношеня Стратеґиї розвою наших медийох и у складзе з тим документом. Одбор потримал конкурованє Новинарскей асоцияциї НАР за средства по конкурсу хтори Покраїнского секретарияту за информованє.