Национални совит рускей националней меншини, на основи члена 6. Закона о националних совитох националних меншинох (“Службени глашнїк РС”, число 72/09), на схадзки хтора отримана дня 31.07.2010. року у Ґосподїнцох, принєсол

С Т А Т У Т

I ОСНОВНИ ОДРЕДБИ

Член 1.

Статут найвисши правни акт Националного совиту рускей националней меншини (у дальшим тексту: Совит) зоз хторим ше реґулує дїялносц, орґанизацию и способ вибору орґанох, як и други питаня хтори значни за роботу Совиту, у складзе з Уставом Републики Сербиї и Законом о националних совитох националних меншинох (у дальшим тексту: Закон).

Член 2.

Совит представительне цело рускей националней меншини на териториї Републики Сербиї, прейґ хторого припаднїки националней меншини окончую свойо права на меншинску самоуправу у обласцох култури, образованя, информованя и службеного хаснованя язика и писма.

Член 3.

Совит ма свойство правней особи хторе здобува з уписом до реґистру националних совитох националних меншинох хтори водзи министерство цо компетентне за людски и меншински права (у дальшим тексту: министерство).
Совит представя и заступа предсидатель Совиту.

Член 4.

Назва Совиту така:
НАЦИОНАЛНИ СОВИТ РУСКЕЙ НАЦИОНАЛНЕЙ МЕНШИНИ.

Член 5.

Шедзиско Совиту у Руским Керестуре, Фрушкогорска 64.

Член 6.

Символ Совиту таки:

Член 7.

        Совит ма печац округлей форми, пречнїку 41mm зоз шлїдуюцим текстом:
        На сербским язику и з кирилским писмом: "Национални савет русинске националне мањине Руски Крстур".
        На руским язику: "Национални совит рускей националней меншини Руски Керестур".
        У штредку печаца герб Руснацох у Републики Сербиї.
        Совит ма ище єден печац идентичней форми и тексту, означени з римским числом 1 (єден) под гербом, хтори ше хаснує за финансийни роботи.

II СОВИТ

1. СОСТАВ СОВИТУ

Член 8.

Членох Совиту ше вибера на основи Закона.
Мандат членох Совиту тирва штири роки од дня верификациї мандатох.
Члени Совиту окончую свою функцию пре витворйованє индивидуалних и колективних правох припаднїкох рускей националней меншини на териториї Републики Сербиї, у складзе з Уставом Републики Сербиї, законами и Статутом.

Член 9.

Совит ма 19 членох.

Член 10.

Орґани Совиту тоти:
1. предсидатель и троме подпредсидателє;
2. Вивершни орґан;
3. одбори за:
 образованє,
 културу,
 информованє,
 службене хаснованє язика и писма,
 младеж и спорт,
 науку;
4. секретар Совиту.

Совит може установиц и други одбори за обласци зоз своєй компетенциї.

2. ПРАВА И ОБОВЯЗКИ ЧЛЕНОХ СОВИТУ

Член 11.

Член Совиту ма право:
1. участвовац у пририхтованю, приношеню, вивершованю и контроли вивершованя одлукох Совиту;
2. поставиц питанє и питац пояшнєнє од орґанох Совиту и достац одвит пре витворйованє правох зоз точки 1. того члена;
3. питац и достац фахову помоц од орґанох Совиту за окончованє своєй функциї.

Член 12.

Член Совиту ма обовязку:
1. активно участвовац у ровоти Совиту, Вивершного орґана або одбору чий є член;
2. усно або у писаней форми дац знац предсидательови Совиту, предсидательови Вивершного орґана або предсидательови одбору чий є член у случаю же нє може присуствовац на схадзки або кед є зопарти зробиц дацо цо му наложене;
3. вивершовац одлуки або налоги орґанох Совиту и о тим подншиц звит.

Член 13.

Членови Совиту престава членство у Совиту скорей як видзе час на хтори є вибрани:

1) з подношеньом задзекованя;

2) зоз ступаньом на роботу або з пребераньом функциї хтора нєзлучна зоз членством у Совиту;

3) зоз траценьом єдного з общих условийох за здобуванє активного виберацкого права;

4) кед вецей як єден рок нє участвує у роботи Совиту;

5) у случаю шмерци;

6) кед му престанє место биваня на териториї Републики Сербиї;

7) кед є з конєчну одлуку компетентного орґана висцерани з окремного виберацкого списку припаднїкох националней меншини;

8) кед є з правномоцну пресуду осудзени за виновне дїло на кару гарешту хтора тирва длужей як шейсц мешаци.

Дзень преставаня членства у Совиту констатує Совит на першей наступней схадзки после приманя обвисценя о наступаню причинох за преставанє членства у Совиту.
Кед членови Националного совиту престанє мандат, його место у Совиту забера кандидат з виберанковей лїстини на хторей ше находзел член хторому престал мандат, а хторого менує предкладач лїстини.
Предкладанє предкладача лїстини ше доручує предсидательови Совиту у писаней форми.
Час тирваня мандата члена Совиту хторому членство престало рахує ше до мандату нового члена Совиту.

Член 14.

Совит може мац почесних членох.
За почесного члена може буц менована особа хтора зоз своїм дїйствованьом дала окремне доприношенє унапредзеню положеня и правох припаднїкох рускей националней меншини у Републики Сербиї.
Особа хтору ше менує за почесного члена нє муши буц припаднїк рускей националней меншини.
На предкладанє предсидателя Совиту, предсидателя одбору або найменєй єдней трецини членох, Совит може принєсц одлуку о додзельованю статуса почесного члена. Одлуку ше приноши з векшину гласох вкупного числа членох Совиту.
Почесни член нє ма право гласа у Совиту, анї нє може буц член орґанох Совиту. Почесни член може буц член консултативного цела Совиту.

3. МАНДАТ СОВИТУ

Член 15.

Мандат Совиту почина з дньом отримованя конститутивней схадзки и тирва штири роки.
Мандат Совиту на основи Закона престава кед:
1) Совит нє зашеда длужей як шейсц мешаци;
2) кед нє вибере предсидателя Совиту у чаше 60 дньох од конституованя Совиту або од преставаня функциї предсидателя;
3) нє принєше статут у чаше яки утвердзени зоз Законом;
4) у инших зоз Законом утвердзених случайох.
У случайох зоз пасуса 2. того члена Министерство приноши ришенє о розпущованю Совиту.
Чечуци и нєодкладаюци роботи з компетенциї Совиту, по конституованє нового Совиту, окончує дочасни орґан, у хторим предсидатель и штирме члени.
Министерство менує дочасни орґан зоз шорох членох Совиту.

4. КОМПЕТЕНЦИЇ СОВИТУ

Член 16.

Совит, у складзе зоз Законом и Статутом, прейґ своїх орґанох самостойнє:

1) приноши и меня Статут Совиту;
2) приноши финансийни план, финансийни звит и закончуюци рахунок;
3) розполага з власним маєтком;
4) одлучує о назви, символох и печацу Совиту;
5) утвердзує предкладаня националних символох, ознакох и шветох националней меншини;
6) снує установи, здруженя, фондациї, привредни дружтва у обласци култури, образованя, обвисцованя и службеного хаснованя язика и писма и других обласцох хтори значни за очуванє идентитету националней меншини;
7) предклада представителя националней меншини до совиту за медзинационални одношеня у єдинки локалней самоуправи;
8) установює и додзелює припознаня;
9) иницирує приношенє и провадзи запровадзованє законох и других предписаньох з обласци култури, образованя, информованя и службеного хаснованя язика и писма;
10) участвує у пририхтованю предписаньох и предклада вименки и дополнєня предписаньох зоз хторима ше ушорює з Уставом ґарантовани права националних меншинох у обласци култури, образованя, информованя и службеного хаснованя язика и писма;
11) предклада окремни предписаня и дочасни мири у обласцох у хторих ше витворює право на самоуправу, пре посцигованє подполней ровноправносци медзи припаднїками националней меншини и гражданами хтори припадаю векшини;
12) порушує поступок пред Уставним судом, Защитнїком гражданох, Покраїнским и локалним омбудсманом и другима компетентнима орґанами, кед оценї же пришло до потупеня з Уставом и Законом ґарантованих правох и шлєбодох припаднїкох националних меншинох;
13) порушує поступок з точки 12) того члена у мено припаднїкох националней меншини, з предходно обезпеченим овласценьом у писаней форми;
14) забера становиска, порушує инициятиви и поднїма мири у вязи з тима питанями хтори нєпоштредно повязани з положеньом, идентитетом и правами националней меншини;
15) приноши дїловнїк о своєй роботи;
16) одлучує о других питаньох хтори му зверени зоз Законом, актом автономней покраїни або єдинки локалней самоуправи.

У складзе зоз Законом, Совит ма и окремни компетенциї у обласци образованя, култури, информованя и службеного хаснованя язика и писма.
Совит одлучує о питаньох зоз своєй компетенциї на схадзкох. Схадзки ше отримує по потреби, односно на способ як предвидзене у члену 40. Закона о националних совитох националних меншинох. Схадзки ше водзи по руски, або, по потреби, по сербски.
Совит, орґани Совиту и цела Совиту приноша одлуки з векшину гласох присутних, односно з квалификовану векшину у случайох хтори одредзени зоз Законом и Статутом.

III ПРЕДСИДАТЕЛЬ И ПОДПРЕДСИДАТЕЛЄ СОВИТУ

Член 17.

Совит ма предсидателя и трох подпредсидательох, хторих Совит вибера зоз шорох своїх членох. Предсидатель одредзує подпредсидателя хтори будзе окончовац функцию заменїка предсидателя Совиту.

Член 18.

Совит вибера предсидателя Совиту зоз тайним гласаньом.
Предкладанє за предсидателя Совиту може поднєсц найменєй єдна трецина членох Совиту.
Предкладанє за предсидателя Совиту ше подноши у писаней форми и муша го подписац члени хтори предкладаю кандидата.
Єден член Совиту може потримац лєм єдного кандидата за предсидателя.
Совит може, з векшину вкупного числа членох Совиту, одлучиц же би ше предсидателя Совиту виберало з явним гласаньом.

Член 19.

Предсидателя ше вибера на схадзки Совиту.
Вибор предсидателя запровадзує Виберанкова комисия у хторей троме члени Совиту. Виберанкову комисию вибера Совит з явним гласаньом з векшину гласох присутних.
Члени Виберанковей комисиї вибераю медзи собу предсидателя Виберанковей комисиї.
Виберанкова комисия пририхтує и запровадзує виберанки за предсидателя и подпредсидательох Совиту, Вивершни орґан, одбори Совиту и секретара Совиту.

Член 20.

Виберанкова комисия прави, за потреби гласаня, окремну евиденцию членох.
Виберанкова комисия евидентує у окремней евиденциї члена хтори превжал гласацки лїсток за гласанє. Член ше подписує у окремней евиденциї.
Гласа ше зоз заокружованьом на гласацким лїстку шорного числа опрез мена кандидата.
Гласацки лїстки ше уруцує до гласацкей шкатули.
Гласанє закончене кед шицки присутни гласали, або кед видзе час яки одредзени за гласанє.

Член 21.

Кед гласанє закончене, Виберанкова комисия чита гласи.
У гласацкей шкатули муши буц тельо гласацки лїстки кельо члени гласали. У гласацкей шкатули може буц и менєй гласацки лїстки од числа тих цо гласали.
У случаю же ше у гласацкей шкатули находза вецей лїстки од числа тих цо гласали, виберанкови поступок, з истима кандидатами ше повторює.
Виберанкова комисия утвердзує кельо члени гласали, кельо єст важаци, а кельо нєважаци лїстки и кельо гласи достал кажди кандидат.
Предсидатель Виберанковей комисиї подноши Совиту звит о резултатох виберанкох.

Член 22.

За предсидателя Совиту вибрани кандидат хтори достал векшину гласох вкупного числа членох Совиту.
Кед же анї єден з вецей кандидатох за предсидателя Совиту нє достал потребну векшину, виберанкови поступок ше повторює док ше предсидателя нє вибере.

Член 23.

У поглядзе вибору подпредсидательох Совиту ше применює правила о виборе предсидателя Совиту.

Член 24.

Предсидатель и подпредсидателє Совиту за свою роботу одвитую Совиту.

Член 25.

Предсидателя и подпредсидательох Совиту ше розришує по истим поступку як су и вибрани.

1. КОМПЕТЕНЦИЇ ПРЕДСИДАТЕЛЯ И ПОДПРЕДСИДАТЕЛЬОХ СОВИТУ

Член 26.

Компетенциї предсидателя Совиту:
1. представя и заступа Совит;
2. предклада план роботи Совиту;
3. зволує схадзки Совиту и предшедує на нїх;
4. предклада кандидатох за предсидателя, подпредсидательох и членох Вивершного орґана Совиту, як и секретара Совиту;
5. подноши звит о окончованю зверених компетенцийох;
6. стара ше о евидентованю питаньох яки поставели члени Совиту и провадзи поступок даваня одвитох на исти;
7. помага у роботи членом Совиту;
8. подписує одлуки Совиту и записнїк зоз схадзки Совиту;
9. ма право иницировац зволованє схадзки одбору Совиту;
10. одвитує за законїтосц у дїлованю Совиту;
11. унапрямує роботу секретара Совиту у складзе з одлуками Совиту и на основи своїх овласценьох;
12. утвердзує роботи фаховей служби у поглядзе орґанизациї роботи, пририхтованя и вивершеня одлукох Совиту и Вивершного орґана Совиту, а на предкладанє секретара Совиту у сотруднїцтве з вивершним орґаном Совиту.

Кед предсидатель онєможлївени, заменює го подпредсидатель хтори меновани за заменїка.
Як совитодавни орґан предсидателя Совиту, формує ше Предсидательство до хторого уходза подпредсидателє и предсидатель Вивершного орґана. Предсидательство дава совити предсидательови Совиту кед єст потреби дац думанє по наглим поступку хторе вимагаю державни управни орґани и образовни институциї, як и совити при виплацованьох хтори нє мож одложиц.

2. ПРЕСТАВАНЄ МАНДАТА ПРЕДСИДАТЕЛЯ И ПОДПРЕДСИДАТЕЛЬОХ СОВИТУ

Член 27.

Мандат предсидателя и подпредсидателя престава:
1. з подношеньом задзекованя;
2. з преставаньом членства у Совиту;
3. з розришеньом по истим поступку як є вибрани;
4. зоз шмерцу.

Член 28.

Кед предсидатель або подпредсидатель нє розришени у поступку розришеня, нови поступок розришеня нє може буц порушани скорей як прейду 3 мешаци.

IV ВИВЕРШНИ ОРҐАН СОВИТУ

1. СОСТАВ ВИВЕРШНОГО ОРҐАНА

Член 29.

Вивершни орґан ма предсидателя и 6 членох, хтори предсидателє одборох.
Предсидателя Вивершного орґана кед є онєможлївени заменює член Вивершного орґана хторого одредзи предсидатель.

Член 30.

Предсидатель и члени Вивершного орґана одвитую за свою роботу Совиту и предсидательови Совиту.

Член 31.

Предсидателя и членох Вивершного орґана ше вибера з тайним гласаньом.
Совит може одлучиц, з векшину вкупного числа членох, же би ше предсидателя и членох Вивершного орґана виберало з явним гласаньом.
Предкладанє за предсидателя и членох Вивершного орґана може поднєсц предсидатель Совиту, або найменєй єдна трецина членох Совиту.
Предкладанє ше подноши у писаней форми, з ясним назначеньом хто кандидат за предсидателя, односно члена Вивершного орґана.

Член 32.

Предсидатель и члени Вивершного орґана нє муша буц члени Совиту.

Член 33.

У поглядзе поступку за вибор Вивершного орґана ше применює правила о виборе предсидателя Совиту.

2. РОБОТИ И КОМПЕТЕНЦИЇ ВИВЕРШНОГО ОРҐАНА

Член 34.

Вивершни орґан за свою роботу одвитує Совиту. Вивершни орґан обовязни периодично, а найменєй раз рочнє, подношиц звит о своєй роботи Совиту.
Члени Вивершного орґана за свою роботу одвитую предсидательови Вивершного орґана и предсидательови Совиту.

Член 35.

Предсидатель и члени Вивершного орґана, кед су нє члени Совиту, маю право присуствовац на схадзкох Совиту, подношиц предкладаня и участвовац у дискусиї без права одлучованя.

Член 36.

Вивершни орґан:
1. пририхтує одлуку о прилапйованю периодичного обрахунку;
2. пририхтує предлог Статута, финансийного плану, финансийного звиту, закончуюцого рахунку Совиту;
3. пририхтує предлоги одлукох Совиту;
4. запровадзує, контролує и провадзи вивершованє одлукох Совиту;
5. окончує други роботи хтори Совит звери Вивершному орґану.

Член 37.

Вивершни орґан приноши Дїловнїк о роботи Вивершного орґана хтори ускладзени зоз Статутом и Дїловнїком о роботи Совиту.

3. ПРЕСТАВАНЄ МАНДАТА ВИВЕРШНОГО ОРҐАНА

Член 38.

Мандат Вивершного орґана престава:
1. з конституованьом нововибраного Вивершного орґана;
2. з подношеньом задзекованя вецей як половки членох Вивершного орґана;
3. з розришеньом и преставаньом.

V ОДБОРИ

Член 39.

Совит ма одбори, и то:
1. Одбор за образованє;
2. Одбор за културу;
3. Одбор за информованє;
4. Одбор за службене хаснованє язика и писма;
5. Одбор за младеж и спорт;
6. Одбор за науку.
Совит може конституовац и други одбори.
Одлуку о конституованю одбору Совит приноши з векшину гласох вкупного числа членох Совиту.

Член 40.

Число членох одбору нє може буц менше як  5.
Член одбору може буц член найвецей двох одборох Совиту источашнє.
Одбор ма предсидателя и подпредсидателя, хтори заменює предсидателя одбору у случаю зопартосци.
Предсидатель, подпредсидатель и члени одбору нє муша буц члени Совиту.
Предсидатель Совиту и подпредсидателє Совиту нє можу буц члени одборох.

1. КОМПЕТЕНЦИЇ ОДБОРУ

Член 41.

Одбор у обласцох з компетенцийох Совиту, хтори утвердзени зоз Законом:

1. пририхтує предлоги одлукох Совиту и Вивершного орґана Совиту;
2. одлучує о питаньох хтори му Совит и Вивершни орґан звери;
3. иницирує розправу о поєдиних предкладаньох по наглим поступку;
4. дава думанє у вязи з предкладанями яки утвердзел Совит;
5. окончує други роботи хтори му Совит звери.

2. ВИБОР ОДБОРУ

Член 42.

Предкладанє за предсидателя, подпредсидателя и членох одборох може поднєсц предсидатель Совиту, або найменєй єдна трецина членох Совиту.
Предкладанє зоз пасуса 1. ше дава у писаней форми. У предкладаню муши буц ясно назначене: одбор хтори ше вибера, мена и презвиска кандидатох за предсидателя, подпредсидателя и члена одбору, як и означенє функциї за хтору ше кандидата предклада.
Одбор ше вибера з тайним гласаньом з векшину вкупного числа членох Совиту.
Совит може одлучиц, з векшину вкупного числа членох Совиту, же одбор мож виберац з явним гласаньом.
У поглядзе инших питаньох хтори вязани за вибор членох одборох сходно ше применює правила о виборе предсидателя Совиту и правила о виборе Вивершного орґана Совиту.

Член 43.

О административних роботох хтори вязани за роботу одборох стара ше секретар Совиту.

Член 44.

Способ роботи одбору ше ушорює з Дїловнїком.

VI СЕКРЕТАР СОВИТУ

Член 45.

Предсидатель Совиту предклада секретара Совиту.
Совит вибера секретара Совиту з тайним гласаньом з векшину вкупного числа членох, на час тирваня мандата Совиту.
Совит може одлучиц, з векшину вкупного числа членох Совиту, же би ше секретара виберало з явним гласаньом.
У поглядзе вибору секретара ше сходно применює правила о виборе предсидателя Совиту.
Условия у поглядзе школскей приготовки и роботного искуства за секретара Совиту ше утвердзує з актом о систематизациї роботних местох.

Член 46.

Секретар Совиту:
1. руководзи з фахову службу Совиту;
2. стара ше о окончованю роботох у вязи з роботу Совиту;
3. спрам потреби пририхтує предлоги одлукох чийо приношенє спада до компетенциї Совиту, предсидателя Совиту або Вивершного орґана Совиту;
  4. окончує роботи хтори му Совит або Вивершни орґан зверя;
5. участвує у роботи Совиту, Вивершного орґана и роботних целох Совиту, з правом на дискусию;
6. стара ше о законїтосци роботи Совиту;
7. дава правне думанє у вязи з предкладанями хтори на дньовим шоре Совиту, Вивершного орґана або роботних целох Совиту;
8. стара ше о окончованю орґанизацийних роботох у вязи з роботу роботних целох Совиту;
9. стара ше о составяню записнїкох зоз схадзкох Совиту, Вивершного орґана або роботних целох Совиту;
10. стара ше о преглашованю и обявйованю правних актох Совиту;
11. стара ше о фаховим пририхтованю предлогох одлукох Совиту, Вивершного орґана або роботних целох Совиту;
12. помага предсидательови Совиту коло пририхтованя и зволованя схадзкох Совиту;
13. помага у роботи Совиту, функционерох, роботних целох и членох Совиту;
14. окончує други роботи хтори му зверя предсидатель Совиту або предсидатель Вивершного орґана;
15. запровадзує одлуки Совиту, предсидателя Совиту и предсидателя Вивершного орґана хтори вязани за материялно-финансийне дїлованє;
16. окончує други роботи хтори му зверя предсидатель Совиту и предсидатель Вивершного орґана зоз своїх комепетенцийох.

Член 47.

Совит формує фахову службу за окончованє роботох Совиту, пририхтованя, вивершованя и контроли вивершованя одлукох.
З роботу фаховей служби руководзи секретар Совиту.

Член 48.

Секретар Совиту за свою роботу одвитує Совиту и предсидательови Совиту.

VII КОНСУЛТАТИВНИ ЦЕЛА

Член 49.

Пре детальнєйше розпатранє и ришованє одредзених питаньох зоз своєй компетенциї, Совит може формовац консултативни цела.
Одлуку о формованю консултативних целох, Совит приноши з векшину гласох вкупного числа членох.
Члени консултативних целох нє муша буц члени Совиту.

Член 50.

Совит може по потреби формовац и други стаємни або почасово роботни цела.

VIII НАДПАТРАЮЦИ ОДБОР

Член 51.

Совит вибера Надпатраюци одбор як орґан контроли законїтосци роботи, финансийно-материялного дїлованя Совиту и Вивершного орґана.

Член 52.

Надпатраюци одбор ма пейцох членох хторих вибера Совит звонка своїх шорох, на предкладанє предсидателя Совиту або наймєней єдней трецини членох Совиту.

Член 53.

О обачених нєправилносцох у роботи Совиту и його орґанох и целох Надпатраюци одбор подноши звит у писаней форми предсидательови Совиту и шицким членом Совиту.
Надпатраюци одбор зоз своїх шорох вибера предсидателя Надпатраюцого одбору.

Член 54.

Мандат Надпатраюцого одбору тирва кельо и мандат Совиту хтори го вибрал.

IX ФИНАНСОВАНЄ РОБОТИ СОВИТУ

Член 55.

Средства за финансованє роботи Совиту ше обезпечує з буджету Републики Сербиї, буджету Автономней Покраїни Войводини и буджетох єдинкох локалней самоуправи, донацийох и инших приходох.
Предсидатель Совиту одвичательни за финансийну роботу Совиту.

X ПРАВНИ АКТИ СОВИТУ

Член 56.

Правни акти Совиту и орґанох Совиту то: Статут, одлуки, заключеня, думаня, предкладаня, препоруки и упутства, правилнїки и дїловнїки.
Совит прилапює Статут з векшину вкупного числа членох Совиту.
Предкладанє за пременку Статута може поднєсц найменєй єдна трецина членох Совиту.
Предкладанє ше подноши у писаней форми. У предкладаню муша буц ясно означени одредби чию ше пременку предклада и пременка яку ше предклада.
За пременку Статута ше применює правила хтори ше одноша на його приношенє.

XI ЗАКОНЧУЮЦА ОДРЕДБА

Член 57.

Тот Статут ступа на моц з дньом приношеня.