Дїловнїк о роботи

На основи члена 16. Статута, Национални совит рускей националней меншини, на схадзки хтора отримана дня 31.07.2010. року, принєсол

ДЇЛОВНЇК О РОБОТИ
НАЦИОНАЛНОГО СОВИТУ РУСКЕЙ НАЦИОНАЛНЕЙ МЕНШИНИ

I ОБЩИ ОДРЕДБИ

Член 1.

Зоз тим дїловнїком ше ушорює орґанизацию и способ роботи Националного совиту рускей националней меншини (у дальшим тексту Национални совит) и витворйованє правох и длужносцох членох Националного совиту.
Кед же Национални совит ма одлучиц о питаню за хторе поступок нє предвидзени з тим дїловнїком, Национални совит предходно одлучи о способе одлучованя о тим питаню.

Член 2.

Право и длужносц члена Националного совиту присуствовац на схадзки. За случай зопартосци, члени длужни благочашнє информовац предсидателя.
Право и длужносц члена Националного совиту буц информовани о шицких питаньох хтори значни за окончованє функциї члена Националного совиту, та у тим смислу ма право питац же би ше му благочашнє доручело шицок информативни материял и документацию о питаньох хтори на дньовим шоре схадзки, як и о других питаньох з компетенциї Националного совиту.

Член 3.

Национални совит представя предсидатель Националного совиту.
У  случаю  одсутносци або зопартосци, предсидателя заменює заменїк предсидателя або подпредсидатель хторого овласци предсидатель Националного совиту.

II РОБОТА НАЦИОНАЛНОГО СОВИТУ

Член 4.

Национални совит роби на схадзкох.
Схадзки Националного совиту явни, кед же Национални совит нє одлучи иншак.

Член 5.

Схадзки ше отримує по потреби, а найменєй раз у шейсцох мешацох.

Член 6.

Порядну схадзку зволує и водзи предсидатель Националного совиту по указаней потреби.
Позарядову схадзку зволує предсидатель або особа хтора го заменює и то на обгрунтоване предкладанє у писаней форми найменєй єдней трецини членох Совиту.

Член 7.

Схадзку ше заказує з поволанку у писаней форми и то найменєй пейц днї пред єй отримованьом. У случаю наглосци, схадзку мож заказац и у електронскей форми або на телефон и у кратшим чаше. О наглосци одлучує предсидатель або особа хтора овласцена за заказованє по тим дїловнїку.
Винїмково, кед ше за тим укаже потреба, схадзку Националного совиту мож отримац и електронски або телефонски. Предсидатель Националного совиту длужен на шлїдуюцей порядней схадзки обгрунтовац причини отримованя телефонскей схадзки.

Член 8.

За отримованє схадзки Националного совиту потребне присуство векшини вкупного числа членох Националного совиту.

Член 9.

Схадзку Националного совиту отвера предсидатель кед утвердзи присуство векшини членох. Кед ше утвердзи же нє присутне достаточне число членох, предсидатель схадзку одложи и утвердзи нови час отримованя схадзки.

Член 10.

Предсидатель отвера схадзку и предклада прилапйованє дньового шора.
Пред преходзеньом на дньови шор, прилапює ше записнїк зоз предходней схадзки Националного совиту.
Дополнєнє дньового шора можу предложиц присутни члени на схадзки пред прилапйованьом дньового шора, з обгрунтованьом предкладаня. О предкладаню дополнєня одлучую присутни члени з гласаньом.

Член 11.

О питаню хторе на дньовим шоре, уводне викладанє дава предсидатель або овласцена особа. О питаню хторе ше розпатра водзи ше розправу, после чийого законченя предсидатель або особа хтора дала уводне викладанє, предклада приношенє одлуки або заключеня.

Член 12.

О каждей точки прилапеного дньового шора отвера ше розправу. О шлїдуюцей точки дньового шора мож розправяц аж после гласаня о предходней точки дньового шора.
Кажди член Националного совиту ма право участвовац у розправи.
Шор участвованя у розправи ше утвердзує на основи шора поднєшених приявох за розправу.
Викладанє члена Националного совиту, на основи прияви за розправу, нє може тирвац длужей як пейц минути.
Член Националного совиту може лєм два раз участвовац у розправи по єдней точки дньового шора.

Член 13.

Кед утвердзи же нєт вецей приявених за участвованє у розправи по одредзеней точки дньового шора, предшедуюци заключує розправу и преходзи ше на одлучованє.
Гласа ше явно и то зоз дзвиганьом руки. Члени ше вияшнюю "За", "Процив" або "Стримани". Винїмково, Национални совит може принєсц одлуку же би ше о одредзеней точки дньового шора гласало тайно.
Кед ше закончи розправу о шицких точкох дньового шора и одлучованє о нїх, предшедуюци заключує схадзку Националного совиту.

Член 14.

Предшедуюци може одредзиц павзу у роботи схадзки же би ше окончело потребни консултациї або обезпечело думанє.
Предшедуюци обвисци членох Националного совиту о предлуженю схадзки.

Член 15.

Члени Националного совиту длужни почитовац угляд и достоїнство Националного совиту и особносци членох.
Нїхто нє може бешедовац на схадзки скорей як пита и достанє слово од предшедуюцого.
Бешеднїк може бешедовац лєм о питаню хторе на дньовим шоре.
Нїхто нє може преривац бешеднїка анї го опоминац, окрем предшедуюцого у случайох яки предвидзени зоз тим дїловнїком.
Под час бешеди члена Националного совиту у розправи нє дошлєбодзене доруцовац, односно завадзац бешеднїкови на иншаки способ, як анї даяк иншак поступац, зоз чим би була загрожена шлєбода бешеди. Нє дошлєбодзене хасновац увредлїви вирази, анї виношиц факти и оцени хтори ше одноша на приватни живот других особох.

Член 16.

Кед ше член Националного совиту у своїм викладаню на схадзки увредлїво виражи о другому членови, наводзаци його мено и презвиско або функцию, односно погришно претолкує його викладанє, член на хторого ше викладанє одноши ма право на реплику.
Одлуку о случаю зоз пасуса 1. того члена приноши предшедуюци.
Реплика нє може тирвац длужей як три минути.

Член 17.

О отримованю шора на схадзки стара ше предшедуюци.
Пре потупенє шора на схадзки, предшедуюци може членови Националного совиту вирекнуц миру одбераня слова, кед вон завадза у роботи на схадзки, на способи зоз члена 15. того дїловнїка.
Член хторому вирекнута мира одбераня слова длужен претаргнуц свойо викладанє.
Мира одбераня слова ше нє одноши на право члена на реплику у дальшим цеку схадзки.
Миру одбераня слова ше применює за схадзку на хторей є вирекнута.
У случаю повтореного инциденту або чежшого потупйованя шора, члени Националного совиту можу принєсц одлуку о оддальованю особи хтора потупює шор. Одлуку о оддальованю ше приноши з гласаньом и вона принєшена кед за ню гласа векшина присутних членох на схадзки Совиту.

Член 18.

О роботи на схадзки Националного совиту ше водзи записнїк и тонски ше знїма схадзку, а тот материял ше у електронскей форми чува у архиви Националного совиту.
Записнїк облапя основни податки о схадзки - мена присутних членох,  дньови шор, кратки змист уводних викладаньох за кажду точку дньового шора и текст одлуки або заключеня хторе принєшене на схадзки.
Записнїк водзи технїчни секретар або друга особа хтору за тото задлужи предшедуюци.
Прилапени записнїк подписую предшедуюци и записнїчар.

Член 19.

Национални совит приноши одлуки з векшину гласох присутних.
Одлуки о прилапйованю и вименкох Статута, о прилапйованю програми роботи, о финансийним планє, о виборе орґанох, як и шицки декларациї и резолуциї, приноши ше з абсолутну векшину вкупного числа членох Совиту.
З одлуку ше ушорює одношеня у рамикох правох и длужносцох Националного совиту яки утвердзени зоз Статутом и Законом, одлучує ше о виборе и менованю и ушорює нукашню орґанизацию и одношеня у Националним совиту.
З декларацию ше виражує обще становиско Националного совиту о одредзених питаньох од значносци и интересу за руску националну заєднїцу або о питаньох од ширшей значносци.
З резолуцию ше указує на стан и проблеми у одредзеней обласци од общого интересу и предклада ше мири яки треба подняц.
Гласанє може буц явне и тайне.

Явне гласанє

Член 20.

Национални совит одлучує з явним гласаньом: з дзвиганьом руки або з преволованьом.
Кед ше гласа з дзвиганьом руки, члени ше перше вияшнюю - хто за предкладанє, потим - хто процив предкладаня, и на концу – хто ше стримує од гласаня.
Кед ше гласа з преволованьом, предшедуюци преволує членох по азбучним шоре презвискох, а кажди преволани член вигваря слово "за", "процив" або "стримани". Кед ше гласа з преволованьом у поступку вибору у хторим предложени двоме або вецей кандидати, члени хтори гласаю гуторя полне мено и презвиско кандидата за хторого гласаю.
Предшедуюци одредзи хто будзе записовац вияву члена або його одсутносц, коло його мена и презвиска на списку.
Трима ше же одлука принєшена кед за ню гласала векшина, односно абсолутна векшина у случайох яки утвердзени зоз Законом, Статутом або зоз тим дїловнїком.

Тайне гласанє

Член 21.

Предкладанє же би ше о питаньох з компетенциї Националного совиту гласало тайно може поднєсц предшедуюци або член Националного совиту.
О предкладаню зоз пасуса 1. того члена одлучує ше з явним гласаньом зоз дзвиганьом руки. Предкладанє прилапене кед ше за ньго вияшнї векшина присутних членох Националного совиту.

Член 22.

У Комисиї за запровадзованє тайного гласаня ше находза троме члени Националного совиту, хторих ше вибера з явним гласаньом на схадзки, после приношеня одлуки о тайним гласаню.
Комисия прави окремну евиденцию членох Националного совиту и гласацки лїстки. Кед бере гласацки лїсток, член Националного совиту ше подписує у окремней евиденциї.
Гласа ше так же ше заокружує шорне число опрез предкладаня за хторе член гласа.
Членови Националного совиту муши буц обезпечена тайносц гласаня.
Гласацки лїстки ше уруцує до гласацкей шкатули.
Гласанє закончене кед шицки присутни члени гласали або кед прешол час яки одредзени за гласанє.

Член 23.

По законченим гласаню Комисия почина утвердзовац резултат гласаня.
Комисия чита нєпохасновани лїстки, потим утвердзує число членох хтори гласали з увидом до евиденциї членох Националного совиту и констатованьом числа подписох у евиденциї.
Комисия отвера гласацку шкатулу и винїма гласацки лїстки. Потим ше роздвоює важаци и нєважаци гласацки лїстки чия сума муши одвитовац числу членох хтори гласали.
Важаци лїстки ше роздвоює спрам предкладаньох за хтори члени Националного совиту гласали.
Комисия з читаньом гласох утвердзує кельо гласи хторе предкладанє достало. Вигласане гевто предкладанє хторе достало найвекше число гласох, односно абсолутну векшину у случайох яки утвердзени зоз Законом, Статутом або тим дїловнїком.
Поступок и резултати гласаня муша буц констатовани у записнїку зоз схадзки на хторей тайне гласанє запровадзене. Ґу записнїку ше обовязно приклада и евиденцию членох Националного совиту зоз члена 22. пасус 2. того дїловнїка.
Комисия подноши Националному совиту звит о поступку и резултатох гласаня.

III ЯВНОСЦ  РОБОТИ НАЦИОНАЛНОГО СОВИТУ

Член 24.

О обезпечованю явносци роботи Националного совиту ше стара предсидатель.
Явносц роботи Националного совиту ше обезпечує з обвисцованьом средствох явного информованя о чаше и месце отримованя схадзкох, з оможлївйованьом истим упознац ше з материялами за схадзку и присуствовац на схадзкох, як и на конференцийох за пресу.
Одлуки хтори принєшени на схадзки Националного совиту ше обяви у шицких електронских и писаних медийох на руским язику.

Член 25.

На схадзкох Националного совиту можу присуствовац и заинтересовани гражданє и представителє орґанизацийох у чишлє хторе нє будзе завадзац нормаланей роботи Националного совиту.
Свою намиру присуствовац на схадзки Националного совиту заинтересовани приявя секретарови найпознєйше два днї пред отримованьом схадзки. Кед же ше за присуство на схадзки прияви векше число заинтересованих од технїчних можлївосцох, секретар одредзи особи хтори буду присуствовац, водзаци рахунку о шоре поднєшених приявох.

IV ПРИМЕНЬОВАНЄ ДЇЛОВНЇКА

Член 26.

О применьованю того дїловнїка ше буду старац предсидатель и секретар Националного совиту и вони одвичательни за його применьованє.

Член 27.

Питаня хтори ше одноша на способ роботи Националного совиту, а хтори нє ушорени з тим дїловнїком, мож ушориц з одлуку або заключеньом Националного совиту.

Член 28.

Тот дїловнїк ступа на моц з дньом приношеня.

Число: 211-1-1/10
У Ґосподїнцох, 31.07.2010. року