Позарядова схадзка

ЗАПИСНЇК З ПОЗАРЯДОВЕЙ СХАДЗКИ НАЦИОНАЛНОГО СОВИТУ РУСНАЦОХ

Позарядова схадзка Националного совиту рускей националней меншини отримана соботу, 02.04.2011. року, од 10,00 годзин у Руским Керестуре. На схадзки присуствовали 16 члени НС: Славко Рац, Олена Папуґа, Дюра Винаї, Михайло Зазуляк, Мелания Римар, Йовґен Мудри, Леона Виславски, Наташа Макаї-Мудрох, Микола Ґубаш, Нада Лендєр, Мирон Сабадош, Саша Палєнкаш, Дюра Папуґа, Аранка Медєши, Вера Дупало и Звонко Гнатко. Михайло Малацко, Михайло Еделински и Мирослав Бесерменї були оправдано одсутни. Присутни бул директор Заводу за културу войводянских Руснацох и новинаре з наших медийох.
Предсидатель НС Славко Рац привитал присутних и поинформовал их же записнїк з прешлей схадзки будзе прилапйовани на шлїдуюцей, порядней схадзки. За схадзку предложени шлїдуюци

Дньови шор:

1. Даванє думаня о звиту о роботи Заводу за културу войводянских Руснацох за 2010. рок
2. Даванє думаня о финансийним звиту Заводу за културу войводянских Руснацох за 2010. рок
3. Даванє думаня о планє роботи Заводу за културу войводянских Руснацох за 2011. рок
4. Даванє думаня о финансийним планє Заводу за културу войводянских Руснацох за 2011. рок

Дньови шор єдногласно прилапени. На предкладанє Олени Папуґа прилапене же би ше членом НС за приход на тоту схадзку виплацело лєм драгово трошки, а надополнєня за присуство нє.

Точка 1.
Национални совит Руснацох з 15 гласами "за" и 1 "процив" принєсол

Одлуку

Дава ше позитивне думанє на звит о роботи Заводу за културу войводянских Руснацох за 2010. рок.

Точка 2.
Национални совит Руснацох з 15 гласами "за" и 1 "стримани" принєсол

Одлуку

Дава ше позитивне думанє на финансийни звит Заводу за културу войводянских Руснацох за 2010. рок.

Точка 3.
Директор Заводу за културу войводянских Руснацох Мирослав Кевежди потолковал членом НС же хтори ставки у планє роботи и финансийним планє пременєни у одношеню на їх предходни верзиї, а потим предсидатель НС отворел розправу.
Вера Дупало гварела же би було лєпше кед би члени Совиту у новембру-децембру достали план Заводу за шлїдуюци рок, же би мали часу добре го розпатриц. Потим ше питала докля предвидзени закуп просторийох у Стражиловскей 9, на цо єй директор одвитовал же є предвидзени по 1. юлий, з тим же тераз шицко завиши од того же кеди Завод достанє пенєжи и кеди ше закончи роботи на адаптациї просторийох у Футожзкей 2.
Вера Дупало ше питала прецо опредзелєни 1.100.000 динари за видаванє нотних записох з "Ружи", кед на схадзки Предсидательства порадзене же, кед директор Заводу препущел конкуровац на конкурси покраїнских секретариятох, та того року най ше нотни записи обявя у електронскей форми, а на рок най Завод конкурує на конкурси за видаванє тей кнїжки. Мирослав Кевежди гварел же на Управним одборе Заводу принєшена одлука же би того року заш лєм вишол голєм єден том нотних записох и пребачел ше же тоту одлуку нє може вон, як директор обгрунтовац, алє би то мал предсидатель Управного одбору, хтори нєприсутни.
Далєй, Вера Дупало пригварела же вельо пенєжу опредзелєне за проєкти. Гварела же глєдала най ше менує кому ше плаци за услуги по контрактох и же би ше за идуци рок положела ставку „услуги по контрактох” - за хореоґрафох, дириґентох и других за роботу на терену бо, кед того нє будзе, нє будзе анї култури по наших КУД-ох.
После дискусиї, Национални совит Руснацох єдногласно принєсол

Одлуку

Дава ше позитивне думанє на План роботи Заводу за културу войводянских Руснацох за 2011. рок.

Точка 4.
Заключене же у розправи по предходней точки облапена и тота точка дньового шору, та Национални совит Руснацох єдногласно принєсол

Одлуку

Дава ше позитивне думанє на Финансийни план Заводу за културу войводянских Руснацох за 2011. рок.

На основи Одлуки Школского одбору Основней и штреднєй школи з домом школярох "Петро Кузмяк" о даваню на хаснованє без надополнєня просторийох у школским будинку "Замок" у Руским Керестуре Националному совиту рускей националней меншини, Национални совит принєсол

Одлуку

Адреса шедзиска Националного совиту рускей националней меншини меня ше з Русинска 75 Руски Керестур на Фрушкогорска 64 Руски Керестур.

У складзе з тоту Одлуку, потребне вименїц шицки акти Националного совиту и його орґанох у хторих наведзена адреса шедзиска и тоту вименку прешлїдзиц шицким компетентним орґаном.

Одлука ступа на моц з дньом приношеня.

Предсидатель Националного совиту Руснацох
Славко Рац